A senda fluvial do río Pintillón é un sendeiro lineal de 3,8 km de lonxitude que percorre as marxes do río Pintillón no seu último tramo antes da desembocadura na praia de Areas. O sendeiro pasa pola aldea do Outeiro e percorre o val fluvial no que estaremos sempre rodeados de pequenas parcelas agrícolas.

Cruzaremos o río en varias ocasións e atoparemos muíños, lavadoiros, fontes e hórreos no percorrido. O sendeiro ascende suavemente ata chegar ao cruzamento coa estrada na zona de Barreiro, preto do límite co veciño municipio de Meaño, onde nace, nas faldras dos montes de As Laxes, As Fontiñas e Outeiro do Peixe.